श्रीरामपूर हादरले! भरदिवसा हॉटेल व्यावसायिकाची निर्घृण हत्या; शहरात भीतीचे वातावरण

श्रीरामपूर | प्रतिनिधी | ११ जुलै २०२६

श्रीरामपूर शहरात शनिवारी दुपारी घडलेल्या एका धक्कादायक घटनेने नागरिकांमध्ये खळबळ उडाली आहे. नेवासा रोडवरील हॉटेल लक्ष्मीनारायणचे तरुण चालक व मालक आकाश शेखर दुबैय्या (वेंकटरामन) यांच्यावर हॉटेलमध्येच धारदार शस्त्राने जीवघेणा हल्ला झाल्याची घटना समोर आली. या हल्ल्यात त्यांचा मृत्यू झाल्याची माहिती मिळाली असून, भरदिवसा घडलेल्या या प्रकारामुळे शहरात भीतीचे वातावरण निर्माण झाले आहे.

प्राथमिक माहितीनुसार, दुपारी सुमारे ४ वाजण्याच्या सुमारास काही व्यक्ती हॉटेलमध्ये आल्याचे सांगितले जाते. त्यानंतर झालेल्या वादातून आकाश दुबैय्या यांच्यावर धारदार शस्त्राने वार करण्यात आल्याची माहिती समोर आली आहे. गंभीर जखमी अवस्थेत त्यांना तातडीने साखर कामगार रुग्णालयात हलविण्यात आले. मात्र, वैद्यकीय तपासणीनंतर त्यांना मृत घोषित करण्यात आल्याचे सांगण्यात आले.

घटनेची माहिती मिळताच पोलीस पथकाने घटनास्थळी धाव घेत पंचनामा सुरू केला. परिसरातील सीसीटीव्ही फुटेज, प्रत्यक्षदर्शींचे जबाब आणि इतर पुरावे संकलित करण्याचे काम सुरू असून, तपास विविध अंगांनी केला जात असल्याची माहिती पोलिसांकडून देण्यात आली आहे.

या प्रकरणामागील नेमके कारण अद्याप स्पष्ट झालेले नाही. तपास पूर्ण होईपर्यंत कोणत्याही व्यक्तीबाबत निष्कर्ष काढू नये, असे आवाहनही करण्यात आले आहे.

दरम्यान, घटनेची वार्ता पसरताच नेवासा रोड परिसरात नागरिकांची मोठी गर्दी झाली. कायदा व सुव्यवस्था अबाधित राखण्यासाठी अतिरिक्त पोलीस बंदोबस्त तैनात करण्यात आला असून, दोषींवर कठोर कारवाई करण्याची मागणी नागरिक व व्यापाऱ्यांकडून होत आहे.

या प्रकरणातील पुढील  कारणे आणि संबंधित बाबी स्पष्ट होणार आहेत.