वाशिममधील कोठडीतील मृत्यू प्रकरणात ९ पोलिसांना जन्मठेप; १५ वर्षांनंतर ऐतिहासिक निकाल

वाशिम : तब्बल १५ वर्षांपासून न्यायालयीन प्रक्रियेत असलेल्या पोलीस कोठडीतील मृत्यू प्रकरणात वाशिम जिल्हा सत्र न्यायालयाने महत्त्वपूर्ण निकाल दिला आहे. बेग्या पवार यांच्या मृत्यू प्रकरणात तत्कालीन पोलीस ठाणेदारासह ९ पोलिसांना जन्मठेपेची शिक्षा सुनावण्यात आली आहे.

२०११ मध्ये रिसोड पोलीस ठाण्यात बेग्या पवार यांना चोरीच्या संशयावरून ताब्यात घेण्यात आले होते. त्यानंतर ते पोलीस कोठडीत असताना त्यांचा मृत्यू झाला. या घटनेनंतर प्रकरणाची चौकशी करण्यात आली आणि तपास सीआयडीकडे सोपवण्यात आला.

तपासादरम्यान पवार यांच्या मृत्यूशी संबंधित अनेक बाबी समोर आल्याने संबंधित पोलिसांविरुद्ध गुन्हा दाखल करण्यात आला. त्यानंतर हे प्रकरण वाशिम जिल्हा सत्र न्यायालयात चालले. साक्षी-पुरावे आणि न्यायालयीन युक्तिवादानंतर न्यायालयाने नऊ आरोपी पोलिसांना दोषी ठरवत जन्मठेपेची शिक्षा सुनावली.

१५ वर्षांनंतर आलेल्या या निकालामुळे प्रकरण पुन्हा चर्चेत आले असून, पोलीस कोठडीत नागरिकांच्या सुरक्षिततेचा आणि कायद्याच्या अंमलबजावणीतील जबाबदारीचा मुद्दा अधोरेखित झाला आहे. या निकालामुळे मृत बेग्या पवार यांच्या कुटुंबीयांना न्याय मिळाल्याची भावना व्यक्त केली जात आहे.

दीर्घकाळ चाललेल्या या प्रकरणात न्यायालयाने दिलेला निकाल हा पोलीस कोठडीतील मृत्यूच्या प्रकरणांकडे गांभीर्याने पाहण्याच्या दृष्टीने महत्त्वपूर्ण मानला जात आहे.